وظيفة كيس المح

نظرة حقلية علمية على كيس المح

(وافى كافى ناهى )

وصفة :

كيس لونة اصفر او اصفر مخضر وعبارة عن كيس فية المح واوعية دموية حولية هى المسؤلة انها تأخد البروتين او الفيتامين الى الدم او الكبد وبعدين تتوجة الى المنطقة المخصصة لها فى الجسم .

المفروض ان حجمة يتانسب تناسب عكسى مع العمر يعنى كل ما تقدم الكتكوت فى العمر كلما قل حجم الكيس.

والعمر هنا مش بالايام لا بالساعات

طيب الشغل العلمى والعملى بيقول انة بيمتص خلال 3 ايام و6 ساعات يعنى 78 ساعة لو دا حصل يبقى شغلك كلة تمام .

هنقول كلام علمى ونقول نستفيد منة اية فى الواقع

**يعنى مثلا تركيب محتوى كيس المح 3 حاجات اساسية هى

** البروتين

** احماض دهنية

 ** فيتامينات

 ** اجسام مضادة جاية من الام

طيب نطلع من المعلومة دى بأن ...

  الكيس ناقص فى الكربوهيدرات

طيب اية المكون الاساسى فى العلف المسؤل عن الكربوهيدات

طبعا الذرة

علشان كدا الاستقبال على الذرة زى ما قلت قبل كدا علشان تكلمة كل اللى محتاجة الكتكوت فى العمر دا .

** حاة تانية كمان ان اول عضو بيستقبل مكونات كيس المح هو الكبد وعلشان كدا بنلاقية مايل الى الصفار فى العمر دا .

لية
علشان المحتوى العالى من الاحماض الدهنية اللى جايالة من الكيس يعنى كل ما كان اداء امتصاص كيس المح سليم كل ما كان اصفرار الكبد .

** حاجة خطيرة جدا وهى ان 20% وزن الكتكوت فى الايام الاولى بياخدها من كيس المح والباقى من العلف دا بس علشان نعرف اهمية الكيس دا وما فية من خيرات للكتكوت .

** طيب حاجة هامة جدا وهى ان الكتكوت متعود طول ما هو فى البيضة على انة ياخد اكلة من الكيس دا علشان كدا المعدة مش شغالة ولا الفلورا المعوية ودى بنحتاجها اكثر علشان هضم الكربوهيدرات لان باقى العناصر الغذائية موجودة فى الكيس بصورة سهلة الهضم والامتصاص.

طيب نطلع من دة بأن :-

  بداية اكل الكتكوت على اول مصدر كربوهيدرات هو اللى بيخلى الكتكوت يتحول من اعتمادة الكلى على الكيس الى بداية اعتمادة على الامعاء والفلورا المعوية .

علشان كدا المسافة الزمنية بين الفقس وبين استهلاك اول علف لها دور كبير جدا فى ان الطير دا هيعمل وزن كويس ولا لا .

ودا اللى بيخلينا نقول لو الكتكوت جاى من مسافة كبيرة عجل من التعليف

طيب كمان معلومة خطيرة جدا

اى جسم عاوز بروتين ودهون وفيتامينات وكربوهيدرات علشان ينمو
طيب الكيس فية كل حاجة ماعدا الكبروهيدرات .

يعنى لو اتاخر علية العلف او اى مصدر كربوهيدراتى لاكثر من 24 ساعة هتكون مشكلة فى الوزن مستقبلا لانة كدا كدا بيستهلك من كيس المح بس بيستهلك مواد غذائية ناقصة .

وبالتالى بيقل حجم كيس المح قبل نزول العلف وبالتالى بيقل الوزن النهائى علشان اكتمال تكوني خلايا الامعاء الداخلية والفلورا المعوية .

الشرح دا علشان نوضح امتى ااخر نزول العلف وامتى ابكر بية ولية اعلف ذرة بس .

طيب لو علفت علف على طول مش هيحصل حاجة ضارة لاكن هيتاخر امتصاص كيس المح عن المدة المقررة لة (78 ساعة) لانة بياخد البروتين وغيرة من مصدرين (العلف والكيس) .

طيب هنا مفيش مشكلة الا فى حالة واحدة بس هو تلوث بكتيرى بأى مسبب مرضى زى الكولاى او السالمونيللا وهنا بيجى التهاب كيس المح طبعا مع خلل حرارة التحضين .